<br />اچھی صورت پہ غضب ٹوٹ کے آنا دل کا<br />یاد آتا ہے ہمیں ہائے زمانا دل کا<br />تم بھی منہ چوم لو بے ساختہ پیار آ جائے<br />میں سناؤں جو کبھی دل سے فسانا دل کا<br />نگۂ یار نے کی خانہ خرابی ایسی<br />نہ ٹھکانا ہے جگر کا نہ ٹھکانا دل کا<br />پوری مہندی بھی لگانی نہیں آتی اب تک<br />کیوں کر آیا تجھے غیروں سے لگانا دل کا<br />غنچۂ گل کو وہ مٹھی میں لیے آتے تھے<br />میں نے پوچھا تو کیا مجھ سے بہانا دل کا<br />ان حسینوں کا لڑکپن ہی رہے یا اللہ<br />ہوش آتا ہے تو آتا ہے ستانا دل کا<br />دے خدا اور جگہ سینہ و پہلو کے سوا<br />کہ برے وقت میں ہوجائے ٹھکانا دل کا<br />میری آغوش سے کیا ہی وہ تڑپ کر نکلے<br />ان کا جانا تھا الٰہی کہ یہ جانا دل کا<br />نگۂ شرم کو بے تاب کیا، کام کیا<br />رنگ لایا تری آنکھوں میں سمانا دل کا<br />انگلیاں تارِ گریباں میں الجھ جاتی ہیں<br />سخت دشوار ہے ہاتھوں سے دبانا دل کا<br />حور کی شکل ہو تم، نور کے پتلے ہو تم<br />اور اس پر تمہیں آتا ہے جلانا دل کا<br />چھوڑ کر اس کو تری بزم سے کیوں کر جاؤں<br />اک جنازے کا اٹھانا ہے اٹھانا دل کا<br />بے دلی کا جو کہا حال تو فرماتے ہیں<br />کر لیا تونے کہیں اور ٹھکانا دل کا<br />بعد مدت کے یہ اے داغ سمجھ میں آیا<br />وہی دانا ہے کہا جس نے نہ مانا دل کا
